4 апрелдә, М. Ғафури исемендәге Башҡорт дәүләт академия драма театрында үтәсәк «Нәркәс» трагедияһы (режиссеры И. Ғиләжев, композиторы У. Иҙелбаев) мәшһүр актер һәм драматург Илшат Йомағоловтың яҡты иҫтәлегенә бағышлана. 

Билдәле булыуынса Илшат Йомағолов был пьесаны 1968 йылда яҙа. Халыҡ премьераны оҡшата һәм ул тиҙ арала билдәлелек яулай: төрлө фестивалдәрҙә, смотрҙарҙа приздар, маҡтаулы исемдәр ала. Хәҙер ул инде 40 йылдан ашыу сәхнәләрҙән төшмәй, урыҫ һәм башҡа телдәргә тәржемә ителгән. «СССР халыҡтары драматургияһы» фестивалендә I дәрәжә дипломға лайыҡ була. М. Ғафури исемендәге Башҡорт дәүләт академия драма театрында ла ул 10 йылдан ашыу бара.

Илшат Хәлил улының тыуыуына 80 йыл тулыуға арналған сараға республиканың күренекле шәхестәре, сәхнә ветерандары, әҙиптең яҡындары, замандаштары, яҙыусылар һәм шағирҙар, уның ижадын һөйөүселәр саҡырылған. Төп ролдә Илшат Йомағоловтың ҡыҙы Айһылыу Йомағолова уйнаясаҡ.