Интернет ҡулланыусылар араһында иғлан ителгән конкурс «Минең Рәми» тип атала. Шарттары ябай: халыҡ шағирының ижад емештәрен яттан һөйләп донъя мәғлүмәт селтәренә урынлаштырыу һәм тауыш биреүҙә ҡатнашыу. Ойоштороусылар еңеүселәргә бүләк тә вәғәҙә итә.

Өфөлә йәшәүсе Артур Бикҡужин Рәми Ғариповтың ижадына ғашиҡ. Йыш ҡына ул уның әҫәрҙәрен яттан һөйләй. Был юлы ул «Минең Рәми» конкурсында ҡатнашырға теләк белдергән.

Рәми Ғариповтың «Ҡыш» шиғырын Бөрйән районынан 5 йәшлек Ирхан Үтәбәев ятлай. Был ролик әлегә конкурста иң күп тауыш йыйған.

Сараны Интернетта халыҡ шағирының ижадын яратыусылар төркөмө ойошторған. Уның администраторы Миңзилә Асҡарова әйтеүенсә, бәйге ҡыҫҡа ғына ваҡыт эсендә ҡулланыусылар араһында ҙур ҡыҙыҡһыныу уятты.

Рәми Ғарипов ижадын һөйөүселәр төркөмө башланғысын «Шоңҡар» журналы менән «Баш Арт» ойошмаһы хеҙмәткәрҙәре күтәреп алған. Еңеүселәргә улар бүләк вәғәҙә итә һәм конкурстың маҡсаттары изге, тип билдәләй.

Интернетта «Минең Рәми» конкурсы 17 мартҡа тиклем дауам итәсәк. Еңеүселәр халыҡ шағирының тыуыуына 80 йыл тулыуға арналған тантаналы байрамда бүләкләнәсәк.