Башҡортостан сәнғәте оло юғалтыу кисерҙе. 92 йәшендә Башҡортостандың халыҡ яҙыусыһы, билдәле драматург, С.Юлаев исемендәге Дәүләт премияһы лауреаты, РСФСР-ҙың атҡаҙанған мәҙәниәт хеҙмәткәре, БАССР-ҙың атҡаҙанған сәнғәт эшмәкәре, С.Юлаев ордены кавалеры Нәжиб Вилдан улы Асанбаев (Николай Васильевич) мәрхүм булып ҡалды.

Нәжиб Асанбаев исеме менән республикабыҙҙың театр сәнғәте тығыҙ бәйләнгән. Уның «Ҡыҙыл паша», «Рәйсә», «Фәйзи», «Әхмәтзәки Вәлиди Туған» кеүек пьесалары меңәрләгән тамашасының күңелен яуланы һәм ҙур уңыш ҡаҙанды . Яҙыусының был әҫәрҙәре буйынса ҡуйылған спектаклдәр сәнғәтебеҙҙең «алтын фондын» тәшкил итә. Милли театрҙар барлыҡҡа килеүендә һәм уларҙың артабанғы үҫешендә Нәжиб Вилдан улының өлөшө ҙур. Үҙ эшенең оҫтаһы булған драматург әҫәрҙәрендә халыҡтың милли йолаларын, әҙәп төшөнсәләрен һаҡларға тырышты.

Нәжиб Асанбаев тураһында яҡты хәтирәләр тамашасы күңелендә мәңге һаҡланыр. Драматург менән хушлашыу 30 март үтә.