Тик кинотеатрҙың ябылыуына ҡаршы килеп, ҡала халҡы митингыға сығырға йыйына. Халыҡ шулай уҡ Ишимбайҙағы бүтән булған мәҙәни усаҡтарҙы ла ябыуға ҡаршы. Әйткәндә, «Икар» кинотеатры Ишимбайҙа эшләп килгән берҙән-бер кинотеатр.
Әлеге көндә кинотеатрҙың 40% өлөшө шәхси эшҡыуарға бирелгән. Кинотеатр урынында яңы супермаркет төҙөү ниәте менән эшҡыуар проект та төҙөп өлгөргән.
Ишимбай ҡалаһының мәҙәниәт бүлегендә кинотеатрҙы ябыу тураһындағы мәғлүмәтте кире ҡаҡһалар ҙа, шул уҡ ваҡытта «Икар»– ҙың киләсәге тураһында аңлайышлы итеп бер нәмә лә әйтә алманылар.
- Минең белгәнем буйынса, кинотеатрҙы ябыу мәсьәләһе көнүҙәк планында беренсе урында тормай, был турала беҙ ҡала башлығы үткәргән ултырышта ла һүҙ күтәргәйнек, – тип белдерҙе үҙенең фекерен Ишимбай ҡалаһының мәҙәниәт бүлеге етәксеһе Әлфиә Тимербулатова. - Әгәр ҙә кинотеатр ябылһа, уны яңы төҙөлгән Йәштәр йорто алмаштырасаҡ, Ишимбайҙар киноһыҙ ҡалмаҫ, - тип йомғаҡланы әңгәмәне Әлфиә Тимербулатова.
Әйтеп үтергә кәрәк, Р. Хәмитов үҙенең Ҡоролтайға яҙылған йыллыҡ хатында, мәҙәни усаҡтарҙы ябыуға ҡул ҡуймаҫлығын белдергәйне.
Башҡортостан Президенты үҙенең докладында шулай уҡ киноселтәрҙәрҙе үҫтереү тураһында ла әйтеп үткәйне. «Башҡортостандың мәҙәни донъяһы» порталы