Искәндәр Ғәзизов башҡорт эстрадаһындағы сағыу йондоҙҙарҙың береһе. Маһир йырсы бала-саҡтан йыр-моңға ғашиҡ. Ул тәү тапҡыр сәхнәгә үҫмер йылдарында Башҡортостандың халыҡ артисткаһы Роза Аккучукованың концертында сыға һәм башҡорт халыҡ йырҙарының береһен башҡарып, тамашасыны әсир итә. Искәндәр Ғәзизов Өфө сәнғәт училищеһында, уны тамамлағас, Өфө дәүләт сәнғәт академияһында белем ала. Студент йылдарында, “Өфө егеттәре” исемле төркөм составында сығыш яһаған осоронда уҡ, халыҡ йырҙарын оҫта башҡарыусы һәләтле йырсы булараҡ таныла. Уның башҡарыуында “Атай, әсәй”, “Һинең менән шундай рәхәт миңә”, “Йәй ғүмере”, “Сер бирмә” һәм башҡа йырҙар тамашасы күңеленә хуш килде. 

Сәхнә оҫтаһы “Дуҫлыҡ моңо”, “Урал моңо” фестивалдәрендә, “Ирәндек моңдары” конкурстарында призлы урындар яулай, “Гәлсәр һандуғас” телевизион конкурсында “Йыл асышы” номинацияһына лайыҡ була. 

6 апрелдә Искәндәр Ғәзизов йыр-моң һөйөүселәрҙе яҙ ҡояшылай нур һәм илһам өләшер, сағыу тамашаға саҡыра. “Юлға сығам йыр менән” тип аталған концертта йырсының ижадташ дуҫтары Алмас һәм Айҙар Юнысовтар, Фәрүәз Урманшин, Фәриҙә Ғаззалова, Резеда Әминева, Рөстәм Шаһыбалов, Артур Туҡтағолов етәкселегендәге “Далан” фольклор-эстрада төркөмө ҡатнаша. Күркәм йыр-моң байрамында башҡорт моңон, Искәндәр Ғәзизовтың ижадын үҙ итеүселәрҙе көтөп ҡалабыҙ!