ШОС, БРИКС саммиттары алдынан Башҡортосанда йәнә бер форум үтәсәк. Традицияға әйләнгән "Берҙәмлек" фестивале 3-9 июнгә билдәләнгән. Халыҡ-ара форумдарҙы күҙ уңында тотоп, был юлы Һиндостан фольклоры, Бразилия карнавалы, Ҡытай, Афро-Европа сәнғәт өлгөләре күрһәтеләсәк. Шулай уҡ Ҡырғыҙстан, Үзбәкстан, Ҡаҙағстан һәм Тажикстандан коллективтар киләсәк. Ҡатнашыусылар һаны 200 самаһы булыр тип көтөлә. Программаға килгәндә, Берҙәмлекте Бәләбәй ҡалаһы башлап ебәрә, артабан Октябрскийҙа Ҡурай байрамы үтә, Дәүләкән, Туймазы райондарының һабантуйҙары ла "Берҙәмлеккә" тура килтереп уҙғарыла. Фестиваль гала-концерт менән Өфөлә йомғаҡланасаҡ. Халыҡ-ара милли мәҙәниттәр фестивале Башҡортостанда 20 йылдан ашыу уҙғарылып килә. Ошо ваҡыт арауығында беҙгә 50-ләп илдән 300 делегация килгән.