Йәйҙең тәүге айында «Театраль артылыш» тип исемләнгән уникаль проект тормошҡа ашырыла. Өфө, Силәбе, Төмән ҡалалары театрҙары Кемеров, Томск, Новокузнецк ҡалаларына юллана, ә Себерҙең иң яҡшы спектаклдәре беҙҙең тамашасыларға тәҡдим ителәсәк. Рәсәй Федерацияһының Мәҙәниәт министрлығы ойошторған уникаль проектта 1 спектакль тик бер генә тапҡыр уйнала, шулай итеп Өфө тамашасыһына өлкәндәр өсөн 15 спектакль һәм балалар өсөн 4 әкиәт тәҡдим ителәсәк. Проект 1 июндә башланып, Халыҡ-ара балаларҙы яҡлау көнөндә кескәй тамашасылар өсөн 6 ҡалала ла мәрхәмәтлек спектаклдәре ҡуйыла. Киске тамашалар ҡалалар төрлө географик киңлектәрҙә урынлашып, сәғәт айырмалығы булһа ла, бер үк ваҡытта башланасаҡ. Гастролдәрҙе асыу тантанаһын видеобәйләнеш ярҙамында проектта ҡатнашҡан барлыҡ ҡалаларҙың тамашасыһы ла күрә аласаҡ.

Себер тамашасыһына Өфө актерҙары «Бешеные деньги», «Маскарад», «Неаполь – миллионерҙар ҡалаһы», «Баҡсасылар», «Барыһы ла баштүбән» спектаклдәрен һәм балалар өсөн «Юл сатындағы детектив» шаян уйынын тәҡдим итәсәк.

«Театраль артылыш» проекты 18 июнгә тиклем дауам итә.

Сығанаҡ: «Ашҡаҙар» радиоһы