8 июндә Мәжит Ғафури исемендәге Башҡорт дәүләт академия драма театрында Наил Ғәйетбайҙың пьесаһы буйынса ҡуйылған «Бер мәл санаторийҙа…» спектакле премьераһы үтте.

Спектаклде Өфө «Нур» татар дәүләт театрының тәжрибәле режиссеры Илдар Вәлиев сәхнәгә сығарҙы. Драматург Наил Ғәйетбайҙың авторлығындағы спекталдәр иһә бөтә ил буйынса бара. Улар бергәләп ижад иткән тамаша театр тарихында сағыу күренеш булды. 

…Республиканың төрлө төбәктәренән йыйылған элекке хеҙмәт алдынғылары: ябай эшселәр, интеллигенция вәкилдәре ял итергә санаторийға килә. Әммә, беренсе көндән үк аңлашмаусанлыҡтар, сыуалыштар башлана. Етмәһә, төрлө райондарҙан йыйылыуға ҡарамаҫтан, геройҙарҙың яҙмышы бер-береһенә бәйле, хатта ҡайһылары ҡасандыр бер-береһен бик яҡын күргән кешеләр булып сыға…

Спектаклгә, дөйөм алғанда, театрҙың оло быуын артистары йәлеп ителгән. Тәнзилә Хисамова, Нурия Ирсаева, Миңзәлә Хәйруллина, Хәмит Яруллин, Илдар Сәйетов, Суфия Сәфиуллина, Илсөйәр Ғәзетдинова, Рәмзиә Хисамова, Әхәт Хөсәйенов, Заһир Вәлитов, Рауис Заһитов һәм башҡа артистар уйнай.

Тамашасылар һорауы буйынса 26 июндә «Бер мәл санаторийҙа…» комедияһы ҡабатлап ҡуйыла. 

 «Башҡортостандың мәҙәни донъяһы» порталы