Айнур бәләкәй сағынан уҡ мәҙәниәткә ғашиҡ Мәүлиҙә менән Рәшит Туҡтаевтар ғаиләһендә үҙ һәләтен ҡеүәтләүҙәрен тойоп үҫә. Әсәһе яғынан килә уның моңға ынтылышы. Олатаһы Нурғәлиҙең халыҡ йырҙарын башҡарыуын иҫе китеп тыңлай бәләкәс Айнур. Уның сәхнәгә сығып башҡалар өсөн йырлау теләге тыуа. 

“Баймаҡ моңдары-2000” район конкурсында ҡатнашып, еңеү яулауы үҫмерҙе сәнғәт юлына алып сыға. Өфө сәнғәт училищеһының Сибай филиалында Джон Мусин кеүек тауышты дөрөҫ ҡуйған уҡы­тыусыла белем алыу Айнурға “Ирәндек моң­дары”, “Гәлсәр һандуғас” конкурстарында уңышлы сығыш яһарға ярҙам итә. Баймаҡ районының Кәрешкә ауылы егете бөгөн З. Исмәғилев исе­мендәге Өфө дәүләт сәнғәт академияһында аспирантурала уҡый.

Йәш йырсы 27 мартта Хө­сәйен Әхмәтов исе­мендәге Башҡорт дәүләт филармо­ния­һының Ҙур залында ижадташ дуҫтары – Башҡорт­ос­тандың ат­ҡа­ҙанған артистары Фәрүәз Урманшин, Резеда Әминева, Вилдан Яруллин, ҡурайсы, Башҡортос­тандың халыҡ артисы Айбулат Рәхмәтуллин – менән бергә тамаша ҡора. 

Әйткәндәй, кем Айнурҙың аспирантура етәксе­һенең исемен атай, шуға бүләк – концертҡа саҡы­рыу ҡа­ғы­ҙы! 272-16-24 телефонына шылтыратып яуабығыҙҙы еткерегеҙ!

Автор: Л. СИТДИҠОВА.

Сығанаҡ: "Башҡортостан" гәзите.