Сибай ҡалаһында «Урал батыр» йәш сәсәндәр бәйгеһе үтте. Былтыр унда 54 команда ҡатнашһа, быйыл республика район-ҡалаларынан 64 команда килгәйне. Уҡыусылар һәр көн һайын, төп сараларҙан һуң, улар өсөн ойошторолған бәйгеләрҙә ҡатнашып, күңел асыу мөмкинлеге алды. Өзләү, сәхнә эше буйынса оҫталыҡ дәрестәре ҡараны.
Эпосты яттан һөйләүселәрҙең бәләкәй төркөмөндә ике еңеүсе билдәләнде – Сибайҙан Лилиә Ибраһимова менән Баймаҡ районынан Гөлнара Ҡазарбаева. Өлкән класс уҡыусылары араһында Гран-приҙы Күмертау ҡалаһының интернат-мәктәбе уҡыусыһы Инсаф Йәмилев яуланы. Беренсе урында – Ишембай ҡалаһы кадет корпусы тәрбиәләнеүсеһе Ислам Төхвәтуллин.
Сибай ҡалаһында үткән «Урал батыр» йәш сәсәндәр бәйгеһенән Нурия Кинйәбаева әҙерләгән репортажды «Ашҡаҙар» каналында 7 июлдә, 10 сәғәт 15 минуттан тыңлағыҙ. Сығанаҡ: «Ашҡаҙар»