Йөрәктән сыҡҡан йөрәккә етә...
Урамда – яҙ! Әйләнә-тирәләге ығы-зығыға ла иғтибар итмәй, ҡанатланып, осоп көйлө-моңло һуҡмаҡтан Иҙел Нурғәлин килә. Ҡанатланмаҫлыҡмы ни һуң йәш йөрәккә?! Мөхәббәт, сафлыҡ, матурлыҡ менән һуғарылған көйҙәре, йырланыр йырҙары, йондоҙ булып тағы ла яҡтыраҡ балҡыры алда әле йәш егеттең!
“Каруанһарай” студияһы йырсыһы Иҙел Нурғәлиндең “Әсәйемә”, “Аҡландарға кил”, “Ағиҙелдең буйҙарында”, “Рәхмәт йыры”, “Иман бирһен Хоҙай”, “Ғүмерем”, “Дуҫтар”, “Сейәләрем”, “Ҡарлуғас” кеүек йырҙарын йәше лә, ҡарты ла ихлас яратып тыңлай.
Ғәҙәттә, кешенең булмышын һәм асылын хеҙмәт иткән һөнәре билдәләй. Һәр ваҡыт нимәлер менән мәшғүл, тик хәрәкәттә булған, үткер ҡарашлы, тынғыһыҙ Иҙел үҙен баянсы, композитор, йырсы итеп кенә түгел, һөйләһә теленән бал тамған һүҙ оҫтаһы – төрлө сараларҙа, юбилей, туй мәжлестәрендә шәп алып барыусы булараҡ та танытып өлгөрҙө.
Әйткәндәй, ул “Эх, йырлап йәшәүҙәре...” исемле дәртле концерты менән Башҡортостанды гөрләп урап сыҡҡандан һуң, 16 майҙа Х. Әхмәтов исемендәге Башҡорт дәүләт филармония- һында йәнә үҙенең дуҫтарын, туғандарын, яратҡан тамашасыһын йыя.
Сағыу тамашала уның ижадташ дуҫтары Венера Юлгилдина, Вилдан Яруллин, Юнир Һағынбаев, Алина Дәүләтханова, Таһир Шәһивәлиев, Лариса һәм Илдар Хәтмуллиндар ҡатнаша.
Иманыбыҙ камил, талантлы, ярҙамсыл, эскерһеҙ, ябай, дуҫтары, тамашасыһы алдында һөйөү-хөрмәт яулаған Иҙел Нурғәлинде алда яҡты, өмөтлө юлдар, оҙон йылдар, үҙенә генә хас булған көйлө-моңло уңышлы ғүмер һуҡмағы көтә...
Автор: Д. ДАНИЛОВА
Сығанаҡ: "Башҡортостан" гәзите.
