Шаулап-гөрләп яңы йыл байрамдары ла артта ҡалды. Филармония артистары ике аҙналыҡ байрам каникулдарында көс-дәрт туплағандан һуң, Өфө тамашасыһын ғына түгел, республикабыҙҙың район-ҡалаларында көн иткән йыр-моң һөйөүселәрҙе лә концерттар менән ҡыуандырыуын дауам итә. Шундай тамашаларҙың береһе 28 ғинуарҙа Ҡырмыҫҡалы районы мәҙәниәт һарайында көтөлә. 

Ҡырмыҫҡалы сәхнәһендә башҡорт эстрадаһының легендар йырсыһы Нәзифә Ҡадырова, халыҡ йырҙарын да, башҡорт, рус һәм сит ил эстрада әҫәрҙәрен дә берҙәй оҫта башҡарған Әлфиә Юлсурина, Фәдис Ғәниев, Лилиә Биктимерова, Заһир Иҫәнсурин, Марсель Ҡотоев, Римма Амангилдина, Руслан Сәйфетдинов, Вадим Зәкиевтар сығыш яһаясаҡ. Халыҡ араһында киң танылыу яулаған оҫта баянсылар Хәлит Фатыхов һәм Ғәли Алтынбаев, билдәле ҡурайсы Азат Биксурин залды илаһи моңға күмәсәк. Зарина Солтангилдина һәм Артем Машков башҡарыуындағы дәртле бейеүҙәр бер кемдә лә битараф ҡалдырмаясаҡ.

Сағыу сығыштар, заманса хиттар, тере тауыш менән башҡарылған йырҙарға бай тамашала Һеҙҙе көтөп ҡалабыҙ, дуҫтар!