Пенза ҡалаһында “Волга буйының уңышлы ғаиләһе – 2013” тип аталған беренсе округ фестиваль-конкурсы тамамланды.

Фестивалдә Волга буйы округынан барлығы 25 ғаилә ҡатнашты. Шул иҫәптән Башҡортостан республикаһы намыҫын был йәмле бәйгелә ике ғаилә- Мөхәмәтйәровтар һәм Ғәзизовтар яҡланы. Һөҙөмтәлә, тәүге ғаилә өсөнсө урынға лайыҡ булһа, Ғәзизовтар ғаиләһе “Интернациональ ғаилә” номинацияһында еңеп сыҡты.

Был мәртәбәле бәйгелә ҡатнашып, өсөнсө урынға лайыҡ булған Мөхәмәтйәровтар ғаиләһе башлығы Әлмир конкурс тураһында:

- Һәр ғаилә 7 минуттан торған “визитка” менән сығыш яһаны. Шул ваҡыт эсендә үҙ ғаиләң, ҡыҙыҡһыныуҙарың, ғаиләңдең тормош рәүеше менән таныштырып, тамашасы күңелен әсир итергә тейеш инең. Ғөмүмән, бәйге бик матур үтте. Яңы дуҫтар таптыҡ. Һәм иң мөһиме - ҡатнашыусылар араһындағы мөхит шул тиклем йылы мөнәсәбәт, мөғәмәләгә ҡоролған ине. Беҙ иң әҙ балалы ғаилә булдыҡ (көлә), сөнки унда башҡа төбәктәрҙән утыҙар бала ҡараған ҡатнашыусылар булды. Миңә, айырыуса, яҡташтарыбыҙ – Ғәзизовтарҙың сығыштары бик оҡшаны. Әгәр ошо ише фестиваль, конкурстар йышыраҡ ойошторолоп торһа, уйлауымса, йәмғиәтте бар иткән сәләмәт ғаиләләрҙең һаны ла күпкә күберәк булыр ине, - ти.

“Уңышлы ғаилә” – РФ президентының Волга буйы федераль округында тулы хоҡуҡлы вәкиле Михаил Викторович Бабич ярҙамында бойомға ашырылған мөһим проекттарҙың береһе. Проекттың маҡсаты – ғаилә, күп балалаы ата-әсәйҙәрҙең абруйын арттырыу, ыңғай тәжрибәне башҡаларға күрһәтеү.

Сығанаҡ: "Шоңҡар" журналынан