Зәйнәб Биишева исемендәге «Китап» нәшриәт йортонда шағир, С.Юлаев исемендәге Дәүләт премияһы лауреаты Ирек Кинйәбулатовтың «Ғүмер китабы» тип исемләнгән китабының исем туйы үтте. Шағирҙы иҫтәлекле көн менән ҡотларға ижадташ дуҫтары Рауил Бикбаев, Рәшит Шәкүр, Ҡәҙим Аралбаев, Гөлфиә Юнысова, Фәрзәнә Ғөбәйҙуллина, Хәсән Назар һәм әҙиптең ижадын һөйөүселәр йыйылды. Байрамды Башҡортостандың халыҡ артисы Роберт Юлдашев моңло ҡурай моңдары менән асты. «Китап» нәшриәте директоры Илһам Йәндәүләтов шағирҙы тәбрикләп үтте.

Был кисәлә Ирек Кинйәбулатов адресына бик матур һүҙҙәр әйтелде. Әйткәндәй, «Ғүмер китабы»ның Ирек Лотфый улының 75 йәшлек юбилейы алдынан сығыуы икеләтә ҡыуаныслы. Рәшит Шәкүрҙең «Ирек Кинйәбулатов – әҙәбиәтебеҙҙең шатлығы» тиеүендә арттырыу юҡ, быны беҙ, тамашасылар, сара барышында инандыҡ. Гөлфиә Юнысова уның кешелекле, итәғәтле кеше булыуын билдәләне. Ҡәҙим Аралбай ҙа китапты юғары баһаланы, бында иң ҡәҙерле әҫәрҙәр ингән, күркәм юбилейыңды йөкмәткеле китап менән ҡаршылайһың, тине ул. Фәрзәнә Ғөбәйҙуллина иһә китапты йөрәк ынйылары менән сағыштырҙы.

«Ғүмер китабы»нда шағирҙың ярты быуатлыҡ ижад осоронда төрлө йылдарҙа сыҡҡан китаптарынан алынған шиғри шәлкемдәр, шулай уҡ яңы яҙылған әҫәрҙәре тәҡдим ителә.