17 апрель көнө 13.00 сәғәттә Кумертау ҡалаһының «Дуҫлыҡ» Мәҙәниәт һарайында күренекле шағирә Башҡортостандың атҡаҙанған мәҙәниәт хеҙмәткәре, Рәми Ғарипов һәм Фәтих Кәрим исемендәге премиялар лауреаты Тамара Ғәниева яҡташтары менән осраша.

Был юлы Тамара Әхмәтшәриф ҡыҙы тамашасы алдына Мәжит Ғафури исемендәге Башҡорт дәүләт академия драма театрының «Ҡыҙҙар моңо - моңо халҡымдың» тигән поэтик-музыкаль проекты сиктәренә сыға. Проект авторы – Башҡортостандың һәм Рәсәйҙең халыҡ артисы, С. Юлаев ис. дәүләт премияһы лауреаты Хөрмәтулла Үтәшев.

Ошо уҡ көндө 19.00 сәғәттә Ишембай Ҡала мәҙәниәт һарайында билдәле шағирә, Башҡортостандың атҡаҙанған матбуғат һәм киң мәғлүмәт хеҙмәткәре, “Аҡбуҙат” журналының баш мөхәррире, Шәйехзада Бабич исемендәге әҙәби премия лауреаты Тамара Искәндәриә театрҙың ошо уҡ, йәғни, «Ҡыҙҙар моңо - моңо халҡымдың» проекты сиктәрендә үҙенең яҡташтары менән осраша.

Әҙибәләрҙең һәм театр артистарының сығыштары 2015 - Әҙәбиәт йылына бағышлана. Исеменән үк күренеүенсә, тамашала шиғриәт һәм моң тантана итә. Унда Рәсәйҙең атҡаҙанған, Башҡортостандың халыҡ артисткаһы Суфия Ҡорбнғәлиева, Рәсәйҙең атҡаҙанған, Башҡортостандың һәм Татарстандың халыҡ артисткаһы Илсөйәр Ғәзетдинова, Башҡортостандың халыҡ артистары Светлана Хәкимова, Азамат Ғафаров, Башҡортостандың атҡаҙанған артисткаһы Рәзифә Динмөхәмәтова, Ш.Бабич исемендәге дәүләт йәштәр премияһы лауреаты Артур Ҡунаҡбаев, Юлиә Ғәләүетдиноава, Айһылыу Йомағолова, Фәнис Рәхмәтов, Гөлназ һәм Руслан Хайсаровтар Тамара Ғәниева һәм Тамара Искәндәриә шиғырҙарын уҡый. Әҙәбиәт байрамында йырҙар һәм дәртле бейеүҙәр ҙә буласаҡ.