М.В.Нестеров исемендәге Башҡорт дәүләт сәнғәт музейының «Ижад» күргәҙмә залында 26 февралдән 26 апрелгә тиклем фоторәссамдар Сергей Балалаев һәм Александр Титовтың 2002–2011 й.й. Гималай һәм Тибет таулыҡтарында экспедицияла төшөргән фотоларынан торған күргәҙмә асыла. Фотокүргәҙмә «Кайлас саҡырыуы» («Зов Кайласа») тип атала, ул Ҡытай, Индия, Непал илдәре сиктәрендә урынлашҡан изге Кайлас тауына арналған. Тибет халҡы был тауҙы Канг Ринпоче тип йөрөтә, уларҙың телендә «ҡарлы биҙәүес» тигәнде аңлата. Космология ҡарашы буйынса, Кайлас – донъя системаһының үҙәге.
Сергей Балалаев – ғалим, сәйәхәтсе, донъяның төрлө ерҙәренә экспедициялар ойоштороусы, мәҫәлән Индия, Непал, Тибет, Алтай, Мексика, Гватемала, Шпицберген утрауы. Кайлас тауында булған экспедицияла Сергей Рерихтар ғаиләһе менән бәйле урындарға күберәк иғтибарын бүлә.
Александр Титов – фоторәссам, сәйәхәтсе, Көнсығыштың тарихи урындарына экспедиция ойоштороусы.
Авторҙар ғәжәйеп тау менән таныштырыуҙы ғына түгел, ә унан көслө энергетика килеүен күрһәтеүҙе маҡсат итеп ҡуя.

Адресы: Өфө, Космонавтар урамы, 22. Автор: Ирина Мелкозерова