Өфө районының китапханалар системаһы билдәле яҙыусы, сәйәхәтсе, С.Юлаев исемендәге Дәүләт премияһы лауреаты Камил Йыһаншин менән осрашыу кисәһе үткәрҙе. Сара Өфө районы хакимиәтендә үтте. Осрашыуҙа китапхана хеҙмәткәрҙәре, яҙыусылар Фәрзәнә Ғөбәйҙуллина, Роберт Паль, Леонид Соколов ҡатнашты. Матур ижади кисәнең маҡсаты – яҙыусының «Маха или история жизни кунички» китабын рекламалау.

Өфө районы хакимиәте башлығының социаль һорауҙар буйынса урынбаҫары Л.И.Ризуанова яҙыусының ижадына юғары баһа бирҙе. Осрашыу барышында Камил Фәрүхшин улының Америка континентының иң бейек нөктәһе – Аконкагуаға барған сәфәрен сағылдырған слайд, төрлө илдәрҙән алып ҡайтылған ҡыҙыҡлы экспонанттар күрһәтелде.

Кисәне ойоштороусылар яҙыусыға үҙҙәре төҙөгән биобиблиографик күрһәткес бүләк иттеләр. Камил Фәрүхшин улы ла буш килмәгән – китапхана фондына китаптарын бүләк итте.