Башҡорт халҡының милли мәҙәниәтендә кейеҙ баҫыу ҙур урынды биләй. Кейеҙ тормош-көнкүрештә бик киң ҡулланылған. Бөгөн иһә, мода артынан ҡыуыусылар кейеҙҙе үҙ-үҙеңде халәтеңде асыуҙа яҡшы ысул, тип билдәләй. Башҡортостанда, Өфөнөң үҙендә лә кейеҙ баҫыусылар һаны һуңғы йылдарҙа артҡандан-арта, улар араһында быны шәхси эшкә, эшҡыуарлыҡҡа әүереледергәндәр ҙә бар. 13 октябрҙә “Башинформ” мәғлүмәт агентлығы конференц-холында халҡыбыҙҙың ошо милли ҡул эштәренең береһе, кейеҙ баҫыу темаһын яҡтыртҡан күргәҙмә-конференция буласаҡ. Күргәҙмә-конференцияла кейеҙ баҫыу технологияһын ҡулланған Башҡортостан, Өфө, республиканың башҡа төбәктәренең халыҡ оҫталары менән ҡул эше буйынса аралашыу буласаҡ, оҫталар кейеҙ баҫыу шөғөлөнә ҡағылышлы төрлө һорауҙарҙы яҡтыртып, уның серҙәренә өйрәтәсәк. Күргәҙмә-конференцияла ҡатнашыусылар урында үҙенә бәләкәй ҡул эше лә эшләй ала.