«Арғымаҡ» этно-рок төркөмө тамашасылар араһында күптән түгел танылыу яуланы. Шуға ҡарамаҫтан «Арғымаҡ»тар йыр-моң көмбәҙендә лайыҡлы балҡый. Быны төркөмдөң «Керәшен һыуыҡтары-2012» фестивалендә Гран-при яулауы йәнә бер дәлилләне.

 «Керәшен һыуыҡтары» фестивале йыл һайын ғинуарҙа йөҙәрләгән талант эйәһен йыя. Быйыл ун һигеҙенсе тапҡыр уҙғарылған конкурста республика район-ҡалаларынан 500 яҡын кеше ҡатнашты. Фестивалде ойоштороусылар конкурсанттар һәм тамашасылар өсөн изге йолаға әйләнеп өлгөргән йолаға тоғролоҡ һаҡлап Рәсәй йондоҙҙарын – «Виа Чаппа» төркөмөн саҡырҙы.

 Тамашасы өсөн фестивалдең иң сағыу көнө - Гала-концерт. Сарала лайыҡлылар юғары баһаланды. Яңғыҙ башҡарыусылар араһында Гран-прины Учалы егете Илдар Усманов, музыкаль коллективтарҙан «Арғымаҡ» этно-рок төркөмө яуланы. Эстрада бейеүе номинацияһында иһә лайыҡлылар табылманы. Ә «Керәшен һыуыҡтары» ысын сәнғәт һәм изге хис һәм ихласлыҡ тойғолары уятып, тағы бер йылға хушлашты.