Башҡорт дәүләт опера һәм балет театрында Адольф Адандың «Корсар» балеты премьераһы менән Рудольф Нуриев исемендәге XVIII Халыҡ-ара балет сәнғәте фестивале асылды. 

Фестиваль Өфөлә беренсе ижад аҙымын яһаған яҡташыбыҙ бөйөк бейеүсе исемен йөрөтә. Быйыл ул «Сочи-2014» мәҙәни олимпиадаһына һәм быйыл иғлан ителгән музыка йылына арнала.
Йола буйынса, фестивалде асыр алдынан театр етәкселәре, артистар һәм ҡала ҡунаҡтары Рудольф Нуриев барельефына сәскәләр һалды.
— Был премьераға тоташ миҙгел дауамында әҙерләндек, — тине фестивалдең художество етәксеһе, Рәсәйҙең һәм Башҡортостандың халыҡ артисы Леонора Ҡыуатова. — «Корсар» спектакле, «Аҡҡош күле» йәки «Жизель» кеүек үк, мәңгелек.  

Фестиваль ҡунаҡтарын һәм артистарҙы республика Президенты Рөстәм Хәмитов сәләмләне. Ул балетты сәхнәгә ҡуйыусы Юрий Григоровичҡа рәхмәт әйтте һәм оҫтаның беҙҙең театр менән артабан да хеҙмәттәшлек итәсәгенә ышанысын белдерҙе.
Тәүге тапҡыр 19 йыл элек ойошторолған фестиваль балет сәнғәтендә ҙур ваҡиғаға әүерелде, халыҡ-ара статус алды. Ә Рудольф Нуреев үҙенең беренсе бейеүҙәрен башҡарған сәхнәлә донъя артистары сығышының бейеүсебеҙ рухы менән һуғарылыуы мәшһүр балет оҫтаһының үлемһеҙлеге хаҡында һөйләй.

 4 июндә Рәсәй балеты йондоҙҙарының концерты үтә. 5 июндә — «Баядерка», 6 июндә — «Дон Кихот» спектаклдәре ҡуйыла. Фестиваль 7 июндә донъя сәхнәһе йондоҙҙары һәм Башҡорт дәүләт опера һәм балет театрының иң яҡшы бейеүселәре ҡатнашлығындағы ҙур гала-концерт менән тамамлана. 

ы. Фестиваль программаһына театрҙың дүрт балеты индерелгән. 31 майҙа - йәнә «Корсар», 2 июндә — «Жизель», 3 июндә «Аҡҡош күле» спектаклдәре ҡуйыла.   

«Башҡортостандың мәҙәни донъяһы» порталы