27 февралдә, 2-се һанлы Педагогия колледжының тамаша залында моң даръяһында йәшәүсе ижадсыларыбыҙҙың береһе, композитор Айһылыу Сәлмәнованың 55 йәшлек юбилейы айҡанлы осрашыу үтте. Ни өсөн уны яҙмыш сәнғәт юлынан алып киткәне аңлашыла. Айһылыу Сәлмәнова билдәле композитор Рафиҡ Сәлмәновтың ҡыҙы. 

Айһылыу Сәлмәнова башҡорт халҡының музыка сәнғәтен үҫтереүгә үҙ өлөшөн индерә, ул – төрлө музыкаль жанрҙарҙа күп әҫәр яҙған композитор. Уның көйҙәренә милли колорит хас. Күп әҫәрҙәре фортепиано һәм милли уйын ҡоралы ҡурай өсөн яҙылған. Ижадының ярайһы уҡ ҙур өлөшөн балалар сәнғәтенә арнаған. «Аҡҡошҡайым, китмә», «Беләҙегем-йөҙөгөм», «Музыкант», «6 пьеса », «Уралтау улдары» һ.б әҫәрҙәре балалар баҡсаларында, мәктәптәрҙә, Башҡорт дәүләт филармонияһының музыкаль программаларында ҡулланыла, төрлө конкурстарҙа, фестивалдәрҙә яңғырай. 

Осрашыуҙы Ә. Вәлиди исемендәге милли китапхана һәм 2-се һанлы педагогия колледжы ойошторған. 

Кисәлә Айһылыу Сәлмәнованың әҫәрҙәренән торған йырҙар яңғыраны. Шулай уҡ юбиляр, студенттар, уҡытыусылар һорауҙарына ихлас яуап бирҙе.