Өфө ҡалаһының К. Маркс урамында урынлашҡан 57а һанлы йортта күренекле композитор Рәүеф Мортазин исемен мәңгеләштереү маҡсатында, бөгөн ул йәшәгән йортта таҡтаташ асылды. Сараға әҙиптең дуҫтары, яҡын кешеләре, туғандары, ижадын яратыусылар, студенттар йыйылды. 

Рәүеф Әхмәт улы Мортазиндың ижад юлында 7 симфония, 2 опера, оркестр, камерный-инструменталь ансамбль, хор өсөн әҫәрҙәр, шулай уҡ бик күп йыр, романстар бар. Композиторҙың «Азат» (Баязит Бикбай либреттоһы) һәм «Дауыл» (Рәғиҙә Янбулатова либреттоһы, «Ырғыҙ» романы нигеҙендә) операларын тамашасылар яратып тыңлай. Р. Мортазин 250-гә яҡын башҡорт халыҡ йырҙарын эшкәрткән, нотаға һалған. Башҡорт һәм рус шағирҙары һүҙҙәренә 150-нән ашыу йыр яҙған. Йыр һөйөүселәр уның «Дан йыры» (Баязит Бикбай һүҙҙәре), «Түгелмәһен әсәләрҙең күҙ йәше» (Ғәйнан Әмири), «Көт һин мине», «Юҡһыныу», «Таң атҡанда», (Шәриф Бикҡол һүҙҙәре), «Тынмаһындар йырҙарым» (Баязит Бикбай һүҙҙре) һәм башҡа йырҙарын әлеге көндә лә яратып ҡабул итә.

Башҡорт музыка мәҙәниәтенә тос өлөш индергән әҙип хаҡында композитор Данил Хәсәншин, әҙиптең ҡыҙы Римма Мортазина иҫтәлектәре менән уртаҡлашты. Мемориаль таҡтаташ асыу тантанаһында шулай уҡ БР Мәҙәниәт министры урынбаҫары Рәнис Рәйес улы Алтынбаев, БР Композиторҙар союзы идараһы рәйесе, композитор Айрат Ғайсин  сығыш яһаны. 

Автор: Гөлназ Ишемғужина