1917 йылдың 8 ғинуарында, мәшһүр композиторыбыҙ Заһир Исмәғилев донъяға килә. Бөтә ғүмерен Исмәғилев Башҡортостанда музыка ижадын һәм белемен үҫтереүгә арнай. Ижад һәм ағартыу өлкәһендәге ҡаҙаныштары өсөн ул 1963 йылда БАССР-ҙың халыҡ артисы исеменә лайыҡ була, ә 1982 йылда СССР-ҙың халыҡ артисы итеп таныла. Ул шулай уҡ Ленин ордены (1971), Хеҙмәт Ҡыҙыл Байраҡ (1967), Халыҡтар дуҫлығы (1977), «Почет Билдәһе» (1949) ордендары һәм миҙалдар менән наградланған. Уның ише ил азаматтары донъяға йөҙ йылға бер генә тыуалыр. Күңеленә күпме моң һыйған Заһир Исмәғилевтең. Улар араһында йөҙәрләгән йыр, әллә ни саҡлы романс, һоҡланғыс кантаталар бар: «Салауат Юлаев», «Шәүрә», «Ағиҙел тулҡындары», «Урал илселәре», «Аҡмулла» кеүек мәшһүр опералар, «Ҡоҙаса» музыкаль комедиялар — йылдар буйына бөртөкләп йыйылған сихри ынйылар бит улар!

«Башҡортостандың мәҙәни донъяһы»порталы