Йылдан-йыл Бөйөк байрамды бүләк иткән Еңеү яҙы беҙҙән алыҫлаша бара. Әммә ярты быуаттан ашыу ваҡыт үтһә лә, һуғыш шаңдауы онотолмай. Был ерҙә һуңғы һалдат атлағанға, атай-олатайҙарын юғалтҡан һуңғы бала йәшәгәнгә тиклем яралар уңалмаясаҡ әле. Бөгөн Башҡортостанда 65 меңдән ашыу һуғыш һәм тыл ветераны йәшәй. Ҡыҙғанысҡа күрә, сал сәсле ҡаһармандарҙың сафы һирәгәйә бара. Республикала уларҙың тормош шарттарын яҡшырытыу өсөн барыһы ла эшләнә. Ә был көндәрҙә яугирҙар ҡотлауҙар ҡабул итә. Кисә ветерандарҙы Башҡортостан Президенты ла тәбрикләне. Еңеү көнөнә арналған тантана баш ҡаланың Конгресс Холл бинаһында үтте. Тантаналы көйгә орден-миҙалдар сыңы ҡушыла. Фойе буйлап Еңеү һалдаттары атлай. Күкрәктәрендәге һәр награда артында йөҙәрләгән ауыл-ҡалалар яҙмышы ята.
68 йылдан һуң Еңеү яҙын тыуған тупрағында ҡаршы алған ветерандарҙы күбеһе 45-тең 9-сы майын сит яҡтарҙа ҡаршы ала. Кәйеф шул уҡ күтәренке, беҙ генә йәш инек, ти тарихтың тере шаһиттары.
Башҡортостан фронт һыҙығына 700 меңдән ашыу ул һәм ҡыҙын оҙата, уларҙың 300 меңдән ашыуы яу ҡырында ятып ҡала. Беҙгә тыныслыҡ бүләк иткән Еңеү һалдаттарының бөгөн 6 меңдән ашыуы ғына сафта. 58 мең тирәһе тыл ветераны бар.
 Республикала ветерандарға лайыҡлы тормош шарттары тыуҙырыу өсөн мөмкин булғандың барыһы ла эшләнә. Тыныс тормош, яҡты күк йөҙө өсөн беҙ һеҙҙең алда мәңге бурыслы, тине Рөстәм Хәмитов. Муса Гәрәев, Александр Матросов, Миңлеғәле Ғөбәйҙуллин. Башҡортостан яугирҙарының исеме ил тарихына алтын хәрефтәр менән яҙылған. Республика һуғышҡа 11 дивизия, 15 полк, 11 айырым батальон оҙата. Әммә Еңеү өсөн көрәш фронт һыҙығында ғына түгел, тылда ла бара. Ҡулына ҡорал тоторлоҡ ир-аттар һуғышҡа киткәс тормоштоң бар ауырлығы ҡатын-ҡыҙҙар, быуыны ла нығынып өлгөрмәгән бала-саға иңенә төшә. Улар бөтәһе лә фронт өсөн, еңеү өсөн тигән девиз менән йәшәй.
Тантаналы ултырышты байрам концерты йомғаҡланы. Сәхнәлә һуғыш йырҙары яңғырай, ә ветерандарҙың күҙҙәрендә йәш. Әсе юғалтыуҙар һәм бәхет сағылышы. Уларҙың теләге бер - күк йөҙөн бер ҡасан да һуғыш һөрөмө ҡапламаһын, донъялар имен торһон.
Дүрт йылдан ашыу дауам иткән һуғышта еңеү өсөн илгә ныҡ юғары хаҡ түләргә тура килә. Яндырылған йөҙҙәрсә ауыл-ҡалалар, ил тулы етемдәр, өҙөлгән ғүмерҙәр миллиондар менән иҫәпләнә. Һуғыш еле бер ғаиләне лә ситләп үтмәй.