Уға ярашлы баҫма хеҙмәткәрҙәре матбуғатҡа әүҙем яҙылыусы район вәкилдәре менән осрашыуҙар уҙғара. Тәүге кисә үтте лә инде. Коллектив Өфө «Нур» татар дәүләт театрында Тәтешле районы халҡы менән осрашты.

Өфө «Нур» татар дәүләт театрына йыйылыусыларҙы туғанлыҡ һәм берҙәмлек тойғолары бәйләй. Тәтешлеләр осрашыуға тыуған ауылға ҡайтҡан кеүек ағыла. Күптән күрешмәгән дуҫтар осраша, таныштар күрешә, ғөмүмән, һәр кемдә байрамса кәйеф тантана итә. Ҡунаҡтар өсөн тамаша залында бай концерт программаһы әҙерләнгәйне.

Осрашыуҙың тап тәтешлеләрҙән башланыуы осраҡлы түгел. Сөнки газетала төрлө йылдарҙа бик күп Тәтешле вәкилдәре эшләгән. Башҡортостандың халыҡ шағиры Әнғәм Атнабаев та заманында үҙенең ижад юлын тап ошо коллективта башлаған. Баҫманың баш мөхәррире әйтеүенсә, тәтешлеләр әле лә һынатмай. Улар - газетаға иң әүҙем яҙылыусы төбәктәрҙең береһе.

Газета мөхәрририәте тәҡдиме менән ойошторолған сараға район хакимиәте биш автобус бүлеп, баҫманы алдырып уҡыусылар менән һәүәҫкәр коллективтарҙың килеүен тәьмин иткән.

Тамашала сығыш яһаусы район хакимиәте башлығы ҡасандыр «Кызыл таң» газетаһы редакцияһында хеҙмәт итеүсе һәм әлеге көндә лә ал-ял белмәй яҡтыртыусы яҡташтарын ҡотлап, бүләктәр тапшырҙы.

Тәтешлеләр бәхетле. «Кызыл таң»дар менән тәүге осрашыу тыуған ергә, арҙаҡлы шәхестәргә ҡарата һөйөү һәм ғорурлыҡ тойғоһон тағы ла арттырҙы.

Сығанаҡ: «Башинформ»