Күгәрсен районының Яңауыл ауыл мәҙәниәт йортонда ике йылға бер тапҡыр уҙғарылған «Күгәрсен һандуғасы» йыр-моң конкурсының Гала-концерты үтте. Һәүәҫкәр башҡарыусылар араһында үҙғарылған бәйге матур йолаға әүерелгән. 

Ойоштороусылар билдәләүенсә, башҡа йылдар менән сағыштырғанда быйыл ҡатнашыусылар күберәк булған. Конкурста бигерәк тә йәштәр юғары әүҙемлек күрһәткән. Һайлап алыу турына 50-гә яҡын кеше килһә, улар араһынан 26 башҡарыусы Гала-концертҡа үткән. Халыҡ араһынан сыҡҡан һандуғастар алдында эстрада йырҙарынан тыш халыҡ йырҙарын да башҡарыу бурысы торған. 

26 башҡарыусы араһында төрлө һөнәр эйәләре бар: уҡытыусы, тәрбиәсе, ашнаҡсы. Шулай ҙа уларҙы йыр-моңға һөйөү берләштерә. «Күгәрсен һандуғасы» конкурсының еңеүсеһе тип Яңауыл ауыл егете Илназ Буранбаев танылды. Йәш йырсы мәктәптә физкультура уҡыутыусыһы булып эшләй.