Өфөнөң Нестерев исемендәге Башҡорт дәүләт художество музейында билдәле рәссам Юрий Ракша эштәренән торған күргәҙмә асылды. Экспозиция рәссамдың тыуыуына 75 йыл тулыу айҡанлы ойошторолған. Юрий Ракша 1976 йылда «Дерсу Узала» кинофильмының баш ҡуйыусы-рәссамы булараҡ «Оскар» премияһына лайыҡ була. Уның ижадында Рәсәй тарихының иң мөһим ваҡиғалары, атап әйткәндә, XX быуат башы, Бөйөк Ватан һуғышы, ҙур төҙөлөштәр сағылыш таба.
Баш ҡаланың Фоторәсем йортонда иһә Илдар Ғүмәровтың «Икенсе күҙлектән» тип аталған күргәҙмәһе асылды. Егерменсе тапҡыр уҙғарылған экспозицияла Европа, Төркиә һәм Мысырҙа төшөрөлгән 15 эште күрергә мөмкин. Асыу тантанаһында Илдар Ғүмәров йәш фотографтарға оҫталыҡ дәресе лә бирәсәк. Быға тиклем ул Мәскәү, Калининград, Ҡаҙан ҡалаларында һәм Европа дәүләттәрендә эшләп өлгөрҙө.
Совет осороноң һирәк осраған экспонаттары, атап әйткәндә, донъя пролетариаты башлығы Владимир Ленин тарафынан ҡул ҡуйылған хаттар, шулай уҡ боронғораҡ тарих - генералиссимус Александр Суворов, Рәсәй императорҙары һәм уларҙың ғаилә ағзалары имзалаған документтар «Башҡортостан - XX быуат» күргәҙмәһендә күрһәтелә. Экспозиция «Өфө коллекционеры» картиналар галереяһында асылды. Унда шулай уҡ баш ҡаланың танылған рәссамдары Радик Ғарифуллин, Геннадий Огородов, Вәсил Ханнанов, Сергей Краснов, Александр Тюлькиндың эштәре лә ҡуйылған. Күргәҙмәлә быларҙан тыш совет дәүерендәге почта маркалары, тәнкәләр, значоктар, революцияға тиклемге бүләкләү билдәләре менән танышырға мөмкин. Сығанаҡ: «Ашҡаҙар»