Кисә Чебоксарҙағы Сыуаш дәүләт опера һәм балет театры алдындағы майҙанда Сыуашстанда Башҡортостан мәҙәниәте көндәре рәсми асылды. 

— Күрше алыҫ туғаныңдан яҡыныраҡ, ти сыуаш халыҡ мәҡәле. Ысынлап та шулай, — тине Башҡортостан Президенты Рөстәм Хәмитов. — Республикаларыбыҙ араһында ныҡлы бәйләнеш урынлашҡан. Мәшһүр шағирҙар — 18 йәшендә генә Сыуашстан Республикаһының танылған эпосын яҙған Константин Иванов, Яков Ухсай һәм башҡа бик күптәр — Башҡортостан ерендә тыуған. Улар мәҙәниәттәребеҙҙе байытыуға күп көс һалды. 

Республика етәксеһе Чебоксар тураһындағы тәьҫораттары менән дә уртаҡлашты. 

— Баш ҡалағыҙ бөтә республика кеүек үк бик матур, төҙөк. Һеҙҙе Башҡортостанға саҡырам. Республикаларыбыҙ араһындағы бәйләнештәрҙең нығыуын, дөйөм эшебеҙгә ярҙам итеүен теләйем, — тине ул. 

Байрам ҡунаҡтарын Сыуашстан башлығы Михаил Игнатьев сәләмләне.

— Былтыр 30 йыллыҡ тынлыҡтан һуң үҙ-ара файҙалы хеҙмәттәшлекте яйға һалырға ҡарар иттек. Власть органдары ғына түгел, рәссамдар, яҙыусылар, ижад кешеләре араһында ла бәйләнеш үҫһен ине, — тине ул.

Сараны асыу тантанаһынан һуң төбәк башлыҡтары Сыуаш дәүләт художество музейында булды. Унда Башҡортостандың заманса сәнғәт күргәҙмәһен ҡараны. Һуңынан Башҡортостан Президенты Чебоксарҙағы “Экра” фәнни-етештереү предприятиеһына юлланды.

Сығанаҡ: "Башҡортостан" гәзите