Башҡорт эстрадаһына ҡойондай ҡайнап, урғылып ингән игеҙәктәр Алмас менән Айҙар Юны­сов­тарҙы белмәгән кеше юҡ­тыр. Уларға талант Хо­ҙайҙан бик мул итеп, йәлләмәйсә бирелгән. Баян­да ла өҙҙөрөп уйнай­ҙар, йырлайҙар ҙа, көй ҙә ижад итәләр. 

Бәләкәйҙән моң донъя­һында үҫкән Юны­сов­тарҙың сәнғәт юлынан ки­теүе осраҡлы түгел. Ола­талары халыҡ йырҙарын матур йырлай, ә тальянда уйнау буйынса бөтә Илеш райо­нында уға етеүсе булмай. Әсәләре Раушания апай йырлағанда, һандуғастар тынып ҡала, ти ауылдаштары. Йырҙар, гармун моңдарын тыңлап үҫкән малайҙар ҙа сәнғәткә ынтыла. Үҙ аллы йырлап йөрөгән саҡтарында балаларының музыкаға һәләте барлығын һәм уны үҫтерергә, киңәйтергә кәрәклеген һиҙгән Рәшит ағай уларҙы район үҙәге Үрге Йәркәйҙәге музыка мәктәбенә уҡырға бирә. Аҙнаның һәр көнөн тиерлек тыуған ауылдары Түбәнге Сереккүлдән 15 саҡрым юл үтеп уҡырға тура килә уларға. 

Хәҙерге ваҡытта Айҙар менән Алмас Өфө “Нур” театрында музыкант булып эшләй, ижад итә. Былтыр йәй Алмас Айгөл исемле ҡыҙ менән ғаилә ҡорһа, быйыл Айҙар ҙа Стәрлетамаҡ һылыуы Азалия менән сәстәрен сәскә бәйләне. 

Бер нисә йыл элек кенә Өфө дәүләт сәнғәт академияһын тамамлаған егеттәр баш ҡалала ҙур концерт менән сығыш яһарға йыйына. 8 октябрҙә Йәштәр мәҙәниәт һарайында үтәсәк сарала Алмас менән Айҙар тамашасыларҙы өр-яңы йырҙары, баян, тальян моңдары, көлкө һүҙ һәм бейеүҙәр менән һөйөндөрәсәк. Концертта Әнүәр Нурғәлиев, Лиана Ғабдрахманова һәм Башҡортостандың халыҡ артисы Хәлит Фәтихов ҡатнашасаҡ. Тамашаның режиссеры һәм алып барыу­сыһы – билдәле юмор оҫтаһы Мәхмүт Фәтихов. 

Көҙҙөң һағышлы бер көнөндә йырлы-моңло илһам нурҙарына ҡойоноп, күңелдәренә ял алып ҡайтырға теләүселәргә мотлаҡ тамашаға килеү кәрәк.

Сығанаҡ: "Йәшлек" гәзите.