Башҡортостан Президенты Рөстәм Хәмитов Указдары менән республика матбуғат сараларында һәм мәҙәниәт өлкәһендә эшләүсе бер төркөм хеҙмәткәрҙәргә республиканың маҡтаулы исемдәре бирелде.

«Өмет» республика йәштәр газетаһы корректоры Альзира Альбуринаға, БР «Ҡариҙел» редакция-нәшриәт комплексы дәүләт унитар предприятиеһының хаттар бүлеге мөдире Зөлфәрә Зариповаға, «Башҡортостан» телерадиокомпанияһы дәүләт унитар предприятиеһының радиотапшырыуҙар студияһы «Ашҡаҙар» ижади берекмәһе етәксеһе Миләүшә Йәғәфәроваға «Башҡортостан Республикаһының атҡаҙанған матбуғат һәм киң мәғлүмәт хеҙмәткәре» исеме бирелде.

Башҡортостан Республикаһының халыҡ артисы исемен Күгәрсен районы Тәүәкән ауыл мәҙәниәт йорто хеҙмәткәре Ғәзим Ильясов һәм композитор, профессор, З. Исмәғилев исемендәге Өфө дәүләт сәнғәт академияһының композиция кафедраһы мөдире Ләйлә Исмәғилева алды.

Башҡортостан Республикаһының атҡаҙанған артисы исеменә Х. Әхмәтов исемендәге Башҡорт дәүләт филармонияһы солисы Лилиә Биктимерова, М. Кәрим исемендәге Милли йәштәр театры актрисаһы Гөлшат Ғайсина, Нефтекама дәүләт филармонияһы аккомпаниатор-концертмейстеры Марс Ишморатов, Мари Иле Республикаһының «М. Шкетан исемендәге Мари милли драма театры» дәүләт автономиялы мәҙәниәт учреждениеһы филиалы – Мари йәш тамашасы театрының «Станислав» студияһы етәксеһе Станислав Шакиров лайыҡ булды.

«Башҡортостан Республикаһының атҡаҙанған сәнғәт эшмәкәре» исеменә М. Ғафури исемендәге Башҡорт дәүләт академия драма театрының ҡуйыусы режиссеры Айрат Әбүшахманов, З. Исмәғилев исемендәге Өфө дәүләт сәнғәт академияһының кафедра мөдире, профессор Рөстәм Шәйхетдинов лайыҡ булды.

М. Аҡмулла исемендәге Башҡорт дәүләт педагогия университетының художество-графика факультеты деканы Тәлғәт Мөсәлимовҡа Башҡортостандың атҡаҙанған рәссамы исеме бирелде.

«Башҡортостан Республикаһының атҡаҙанған мәҙәниәт хеҙмәткәре» исеменә Өфө сәнғәт училищеһы уҡытыусыһы Анатолий Богомолов, Стәрлетамаҡ дәүләт рус драма театры директоры Виктория Замесина, Силәбе өлкәһе Златоуст ҡалаһының «Һандуғас» халыҡ ансамбле етәксеһе Фәнит Ҡарасурин, Өфөләге «Нефтсе» мәҙәниәт һарайының өлкән администраторы Татьяна Сафронова, Әбйәлил районы мәҙәниәт йорто режиссеры Радмир Солтанбаев, Ишембай ҡалаһы Мәҙәниәт һарайының «Рябинушка» халыҡ вокаль ансамбле етәксеһе Татьяна Яровая лайыҡ булды.

Сығанаҡ: «Ашҡаҙар»