22 июндә Архангел районының Максим Горький ауылында латыштарҙың Лиго байрамы үтә. Байрамда район Мәҙәниәт йорто, «Максим Горький» исмендәге тарихи-мәҙәни үҙәк хеҙмәткәрҙәре, «Атбалс» фольклор ансамбле һәм райондың үҙешмәкәр артистары сығыштары көтөлә. Матур сараға республиканың төрлө райондарынан, шулай уҡ Латвия Республикаһынан ҡунаҡтар саҡырылған.

Лиго – латыштарҙың боронғо байрамы, уның мәғәнәһе уңдырышлыҡ килтереүсе Янис алланы ҡеүәтләүгә ҡайтып ҡала, байрам йәйге ҡояш торған ваҡытта билдәләнә. Был көндә кешеләр төрлө үләндәр йыя – улар байрамда дауалау сифаттарына эйә була тип һанала. Кисен йәштәр йыйылып усаҡ яға, был ҡояштың еңеүен символлаштыра. Усаҡ тирәһендә уйын-көлкө, йыр-бейеү гөрләп тора, йәштәр үҙ-ара таныша. Байрамдың тағы ла бер ҡыҙыҡ йолаһы бар: парҙар усаҡ аша ырғый, улар ырғыған ваҡытта бер-береһенең ҡулдарын ысҡындырмай икән, өйләнешеп, оҙаҡ һәм бәхетле йәшәйәсәк, тип һанала.

«Башҡортостандың мәҙәни донъяһы» порталы