14 майҙан 17 майға тиклем Салауат, Ҡыйғы һәм Мәсетле райондарында М.Ғафури исемендәге Башҡорт академия драма театрының гастролдәре үтә. 

«Февраль. Буран...» спектаклен һайлауҙары осраҡлы түгел. Был — Салауат районында тыуып үҫкән Башҡортостандың халыҡ шағиры Рәми Ғариповтың тыуыуына 80 йыл тулыуға арналған проект. Спектакль Рәми Ғариповтың көндәлектәренә һәм уның тураһындағы хәтирәләргә нигеҙләнгән. Данлыҡлы шағир ижад иткән шиғырҙар һәм йырҙар ҙа башҡарыласаҡ. Спектаклдә бөтә труппа тиерлек ҡатнаша. Рәми ролен ике актер – Фирғәт Ғарипов менән Артур Кәбиров, Надя ролен Ирада Фазлаева башҡара. Шиғырҙарҙы Рәсәй Федерацияһының атҡаҙанған артисы, Башҡортостандың халыҡ артисы Хәмит Яруллин, башҡа танылған сәхнә оҫталары — Хөрмәтулла Үтәшев, Алһыу Бәхтиева, Сәғиҙулла Байегет һәм Светлана Хәкимова уҡый.

Театр артистары Римма Ҡаһарманова, Руслан Хайсаров, Юнир Ҡоланбаев, Илфат Булатов, Ирек Булатов, Урал Әминев, Рәзифә Динмөхәмәтова, Фәнис Рәхмәтов һәм башҡа артистар ҡатнашлығында халыҡ яратып, үҙ итеп өлгөргән спектаклдәрҙән өҙөктәр, моңло йырҙар, дәртле бейеүҙәр, ҡурай моңдарынан торған концерт та күрһәтеләсәк.

«Башҡортостандың мәҙәни донъяһы» порталы