Театрҙың художество етәксеһе Олег Ханов, тәү сиратта, сәнғәт усағының яңылыҡтарын ваҡытында яҡтыртып барғандары өсөн журналистарға оло рәхмәтен белдерҙе һәм юбилей тантанаһы хаҡында һөйләне.

- Беҙҙең юбилей йылы илебеҙҙә иғлан ителгән Мәҙәниәт йылы менән тап килде, быны беҙ бәхетле осраҡ тип ҡабул иттек. Был йыл беҙҙең өсөн бик уңышлы йыл булды: Мәскәүҙең киң билдәле «Сатирикон» театрында һәм Ҡаҙағстанда беҙҙең гастролдәр уҙҙы, шулай уҡ Башҡортостан Республикаһы Президентының 10 млн. Грантына лайыҡ булдыҡ, премьераларыбыҙ уҙҙы. Хөкүмәттең сәнғәткә йөҙ бороуҙарына бик шатбыҙ, грант аҡсаһына беҙ ижади проектарыбыҙҙы тормошҡа ашырҙыҡ, шулай уҡ театр өсөн кәрәк булған техник ҡулаймалар һатып алдыҡ. Киләһе йыл Әҙәбиәт йылы. Әҙәбиәт беҙҙең өсөн изге төшөнсә, сөнки унһыҙ театр йәшәй алмай. Шуға күрә драматургтарҙы беҙҙең менән әүҙем эшләргә саҡырабыҙ, - тине Олег Закир улы.

Шулай уҡ матбуғат конференцияһында театрҙың юбилейы айҡанлы сыҡҡан өс томлы «Мәжит Ғафури ис. Башҡорт дәүләт академия драма театры – спектаклдәрҙә һәм йөҙҙәрҙә» китабының исем туйы үтте. Унда республиканың билдәле һәм йәш театр белгестәренең мәҡәләләре тупланған. Фәнни-популяр баҫмала театрҙың тарихы, үҫеше, данлы шәхестәре хаҡында материалдар тупланған. Тиражы 500 экземпляр.