26 мартта, Мостай Кәрим исемендәге Милли йәштәр театры асылғандан алып ошо театр тамашасыһына тоғро хеҙмәт итеүсе Башҡортостан Республикаһының халыҡ артисы Мәғәфүр Усманов үҙенең 50 йәшлек матур юбилейын билдәләй. 

Мәғәфүр Мәхмүт улы Усманов 1987 йылда Өфө дәүләт сәнғәт академияһын тамамлағандан һуң, Арыҫлан Мөбәрәков исемендәге Сибай дәүләт драма театрында эш башлай. Унда ул төрлө ролдәрҙә уйнай. Баш ҡалала Милли йәштәр театры асылғас, ошо театрға эшкә килә. Үҙенең ижади эшмәкәрлеге осоронда ул донъя драматургияһы репертуарының төрлө жанрҙарында эшләй. З. Биишеваның «Мөхәббәт һәм нәфрәт»ендә - Юламан ҡарт, Ф. Бүләковтың «Йөрәктәрҙә ҡалған эҙҙәр»ендә - Хызыр Ильяс, М. Кәримдең «Салауат»ында - Юлай Аҙналин, «Йәйәүле Мәхмүт»тә - Мәхмүт, «Йәләлетдин атай»ҙа - Йәләлетдин, «Ҡыҙ урлау»ҙа - Әжмәғол, Т. Ғарипованың «Ғилмияза»һында - Бикбау, Т. Миңнуллиндың «Диләфрүзгә дүрт кейәү» музыкаль комедияһында - Ғәлим ролдәрен уйнай. Милли йәштәр театр балалар өсөн дә спектаклдәрҙе күп ҡуя. Шуларҙың Р. Ураҡсинаның «Сыңҡылдаҡ себен» әкиәтендә ул Ҡырмыҫҡа ролен башҡара. Мәғәфүр Мәхмүт улының юбилейы айҡанлы театрҙа Александр Вампилов әҫәре буйынса «Өлкән улым» спектакле сәхәнәләштерелде. Юбиляр был тамашала ғаилә башлығы, Сарафанов ролен уйнай.

Башҡортостан Республикаһының халыҡ артисы Мәғәфүр Усмановты юбилейы менән ихлас ҡотлайбыҙ. Ижад ҡомары һүрелмәһен!