Михаил Нестерев исемендәге Башҡорт дәүләт художество музейының «Ижад» күргәҙмәләр залында «Арғымаҡ» тип исемләнгән күргәҙмә асылды. Экспозицияла 30 рәссамдың 80-гә яҡын эше урын алған. Улар һынлы сәнғәт, скульптура, графика әҫәрҙәре. Күргәҙмә ат темаһына арналыуы менән үҙенсәлекле.

Образдар «Урал батыр» эпосы, «Ҡуҙыйкүрпәс менән Маянһылыу», «Ҡара юрға», «Биш айғыр» кеүек халыҡ ижады өлгөләре аша һынлана. Мәҫәлән, «Аҡбуҙат» башҡорт халыҡ эпосында һүрәтләнгән Һәүбән батырҙың Аҡбуҙҙы күлдән алып сығарыуын Башҡортостандың атҡаҙанған рәссамы Мәүлитбай Хәлилов ябай балсыҡтан эшләп бронзанан ҡойған.

Мәҙәниәт йылына арналған күргәҙмә 20 апрелгә тиклем эшләй. Артабан экспозиция музей филиалдары Стәрлетамаҡ, Салауат, Ишембай һәм Нефтекама ҡалаларында ла ойошторола.