Гастролдәр башҡорт театрының 95 йыллыҡ юбилейына һәм Мәҙәниәт йылына арналды. Ижади төркөм милләттәштәр иғтибарына Мөхәмәтша Буранғоловтың "Шәүрәкәй" драмаһы менән "Күңел ынйылары - дуҫтарға" тип исемләнгән театрлаштырылған концерт тәҡдим итте. Төрлө йәштәге артистар ҡатнашлығында "Шәүрәкәй" музыкаль спектакле сағыу сәхнә биҙәлеше, ҡабатланмаҫ фольклор элементтары менән тамашасы һөйөүен күптән яулаған. Үткән быуаттың 20-се йылдарында ижад ителгән әҫәр бөгөн дә яратып ҡарала. Һамар өлкәһендә гастролдәр шаулап-гөрләп 4-5 апрелдә үтте. Ә инде 6 апрелдә ижади коллектив Тольятти ҡалаһында сығыш яһаны. Туған телде ишетеү, туған телдә йыр-моңдар тыңлау, спектаклдәрҙән өҙөктәр ҡарау Һамар ҡалаһы һәм өлкәһендә, Тольяттила йәшәгән милләттәштәребеҙ өсөн ҙур кинәнес булды. Һәр сығыш алҡыштарға күмелде. Коллективҡа рәхмәттәр әйтеп, ҙур хөрмәт менән оҙатып ҡалды урындарҙа эшләп килгән башҡорт һәм татар йәмәғәт ойошмалары.