Яңы йыл яҡынлашһа, һәр кемдең күңеле мөғжизәгә ышана, хыялдарҙың ҡабул булыуын көтә башлай. Гүйә, Яңы йыл байрамы – серле әкиәт донъяһы! Ә йөрәк хыял-өмөттәрҙән талпына икән, ниңә был ап-аҡ ҡоласлы ҡыш илендә мөғжизәгә бары бер аҙым ҡаршы атламаҫҡа?!
М.Ғафури исемендәге Башҡорт академия драма театры һәр ваҡыт һеҙҙең ҡәҙимге тормошоғоҙға бер аҙ тылсым өҫтәргә әҙер. Һис тә шаштырыу түгел был: Яңы йыл алдынан театр кескәйҙәр өсөн мауыҡтырғыс мажаралар әҙерләй – ошо көндәрҙә Р.Киплингтың әҫәре буйынса әҙерләнгән «Маугли» әкиәте (Ҡуйыусы-режиссер – Д.Сиразиев исемендәге премия лауреаты Айрат Абушахманов, режиссер - Илсур Ҡаҙаҡбаев) көтөлә һәм балаларҙың яратҡан йәнһүрәтенә әүерелгән «Смешариктар»ҙың геройҙары Ҡыш бабай һәм Ҡарһылыу менән берлектә шыршы тирәләй әкиәткә саҡыра. Һалҡын ҡыштарҙың шыҡһыҙ кисендә Маугли, Шер-хан, Табаки, Балу, Акела һәм башҡа әкиәт геройҙары менән джунглины иңләргә, мөғжизә донъяһының һулышын тойорға теләһәгеҙ, театрға рәхим итегеҙ! Премьера көнө - 23 декабрь. Был көндө һеҙҙе тиктормаҫ, ҡунаҡсыл смешариктар ҙа ҡаршы аласаҡ.
Рита Хәсәнова
М.Ғафури исемендәге Башҡорт дәүләт академия драма театрының әҙәбиәт бүлеге мөхәррире.