1 март Магнитогорск ҡалаһының Опера һәм балет театры сәхнәһендә «Ҡатын-ҡыҙ, Мөхәббәт, Яҙ» тип аталған байрам тантанаһы үтәсәк. Сараны ҡала хакимиәте, Башҡортостан Республикаһы һәм Ҡоролтайҙың Силәбе өлкәһендәге вәкиллеге үткәрә. Күп балалы башҡорт әсәләре БР-ҙың Силәбе өлкәһендәге тулы хоҡуҡлы вәкиле Амур Хәбибуллин, билдәле боксер Сабир Сөләймәнов, Силәбе өлкәһе йәмғиәт палатаһы, Ҡоролтайҙың Силәбе өлкәһендәге ағзаһы Найль Шәйҙуллин ҡулынан аҡсалата премия аласаҡтар.
Амур Хәбибуллин әйтеүенсә, БР-ҙың Силәбе өлкәһендәге вәкиллегенең башҡорт халҡының мәҙәниәтен, телен, башҡорт рухын һаҡлап ҡалыуҙа, Силәбе менән Башҡортостандың социаль-экономик бәйләнештәрен үҫтереүҙә роле ҙур. Быйыл вәкиллеккә 15 йыл тула, шуға күрә төрлө саралар үтәсәк, тине ул.
Яҙ байрамында Сибай дәүләт филармонияһы артистарының, шулай уҡ ҡаланың «Йәщлек», «Яйыҡ», «Байрам» башҡорт ансамблдәренең сығыштары көтөлә. Автор: Михаил Хабиров
«Башҡортостандың мәҙәни донъяһы» порталы