«Байыҡ» - Башҡортостан юлдаш телевидениеһының иң уңышлы проекттарының береһе. Республика ғына түгел, башҡа туғандаш халыҡтарҙың да күңелен яулаған телевизион конкурстың өсөнсө туры башланды.
«Байыҡ» республика телевизион конкурсының маҡсаты - башҡорт бейеүҙәренең халыҡсанлығын һаҡлау, уны башҡа тарафтарға танытыу. «Башҡортостан» телерадиокомпанияһының Республика халыҡ ижады үҙәге менән берлектәге проекттың хәҙер инде биш йыллыҡ тарихы бар.
Һәүәҫкәр бейеүселәр бәйгеһендә республиканан, Рәсәй төбәктәренән һәм сит илдәрҙән йыл һайын 500-ләп бейеүсе ҡатнаша. Уларҙың иң-иңдәре финалға сыға. Хәлисә Мирсәйетова - Мәсетле районынының Абдулла ауылынан. Тәүге турҙа «Бер йәшлектә, бер ҡартлыҡта» бейеүе менән сығыш яһаһа, әле баһалама ағзалары хөкөмөнә шаян бейеү тәҡдим итте. Һигеҙенсе тиҫтәһен ваҡлаған Хәлисә Мөбәрәкша ҡыҙы өсөн бейеү - тормош асылы, күңел көҙгөһө.
Республика мәҙәниәтен, бейеү сәнғәтен үҫтереүгә лайыҡлы өлөш индергән бәйгенең төп үҙенсәлеге - халыҡсанлыҡ. Иң мөһиме, ошо ҡиммәтте тамашасы, баһалама ағзаларына хазина итеп еткерә белеү. Конкурс тырышлыҡ, хис, көс һалыуҙы талап итә, ти жюри рәйесе Радмир Бәҙретдинов та. Сығанаҡ: Башҡортостан юлдаш телевидениеһы