Өфөнөң «Нефтсе» мәҙәниәт йортонда «Һылыуҡай» республика гүзәллек бәйгеһенең Гала-концерты үтте. Аҙна дауамында ун ике ҡыҙҙың тәбиғи матурлығы, күңел байлығы менән Башҡортостан юлдаш телевидениеһында эфирға сыҡҡан «Һылыуҡай көндәлеге» аша танышып барған тамашасылар ҡыҙҙарҙы сәхнәнән алҡышланы.

Егерме йыл элек уҙғарыла башлаған матурлыҡ бәйгеһе - яҙ һәм гүзәллек байрамы республикабыҙға ғына түгел, хатта бөтә донъяға йөҙләгән һылыуҡай тәрбиәләне. Уларҙың күбеһе республика, Рәсәй һәм донъя кимәлендә танылыу яуланы. Быйылғы «Һылыуҡай» конкурсы «Имен бала саҡ һәм ғаилә ҡиммәттәрен нығытыу» йылына арналды. Баһалама ағзалары ҡыҙҙарҙың сибәрлегенән, һомғоллоғонан тыш, күңел донъяһына ла иғтибар бүлде.

Ун ике һылыуҡай сәхнәлә үҙен дефиле, бейеү буйынса һынаны. Тамашасыларҙың һорауына яуап биреп, үҙҙәре ижад иткән шиғырҙарҙы уҡыны. Ҡыҙҙарҙың сығышына тамашасылар дәррәү алҡышланы. Быйылғы бәйгенең төп үҙенсәлеге кисәгә башҡа йылдарҙа еңеү яулаусылар ҙа саҡырылғайны.

«Һылыуҡай -2012» конкурсы еңеүсеһе тажын 22 йәшлек Стәрлетамаҡ ҡыҙы Ләйсән Ғәрифйәнова кейҙе. Өсөнсө урын Салауат районы ҡыҙы Алина Мораҙымоваға бирелһә, икенсе урынға Өфө һылыуы Ләйсән Ғасимова лайыҡ булды. Беренсе урынды Миәкәнән Әлиә Исмәғолова яуланы. Ә «тамашасы һөйөүе» титулы Иглин районы гүзәле Гөлназ Ҡотлозамановаға бирелде.

Конкурста ҡатнашыусы һылыуҡайҙар номинациялар буйынса бүләкләнде. Башҡортостан юлдаш телевидениеһы менән Республика Халыҡ ижады тарафынан ойошторолған гүзәллек бәйгеһе матур тәьҫораттар уятып тарихта ҡалды. Яҙ һәм гүзәллек байрамы булып… Матурлыҡтың юҡтыр сиктәре.

Сығанаҡ: Башҡортостан юлдаш телевидениеһы