Башҡортостан халыҡтары Ассамблеяһы советының сираттағы ултырышында "Башҡортостан Республикаһында Рәсәй милләттәре берҙәмлеген нығытыу һәм халыҡтарҙың этно-мәҙәни үҫеше" дәүләт программаһы проекты хупланды. Ул биш йылға иҫәпләнгән һәм граждандар берҙәмлеген нығытыу, милләт-ара мөнәсәбәттәрҙе тағы ла яҡшыртыуға, Рәсәй халыҡтарының этно-мәҙәни күп төрлөлөгөн һаҡлауға, башҡорт этносының күп яҡлы һәм гармониялы үҫешенә йүнәлтелгән. Программа проекты килешеү өсөн республиканың Финанстар министрлығына юлланған. Милләт-ара берҙәмлекте нығытыу буйынса федераль программа Рәсәйҙә 2014 йылдан тормошҡа ашырыла. Йәмәғәтселектең күп өлөшө алдағы йылдарҙа уның милләтебеҙҙең киләсәгенә ыңғай йоғонто яһарҙай һорауҙарҙы хәл итеүгә ярҙам итеренә өмөт бағлай.