Республика Милли музейында үҙенсәлекле күргәҙмәләр ойошторолоп тора. Ошо көндәрҙә унда Новосибирск ҡалаһы оҫтаһы Владимир Анискиндың экспозицияһы асылды. Баш ҡала халҡы һәм ҡунаҡтары «Микроскоп аҫтындағы мөғжизә» тип аталған күргәҙмә менән таныша ала. Мәҫәлән, быраулап тишелгән сәстә рауза сәскәһе, саңдан яһалған ынйыларҙы күрергә була. Экскурсиялар бүлеге мөдире Мәсҡүҙә Әсәҙуллина әйтеүенсә, Владимир Анискиндың 130-ға яҡын микроминиатюра эшенән Башҡортостан халҡына 28 экспонат тәҡдим ителгән. Улар музейға килеүселәрҙә һоҡланыу ғына түгел, ғәжәпләнеү тойғоһо ла уята.