Ольга Старикованың фильмы 20-24 майҙа Нью-Йоркта үтәсәк «Евразия төнө» фестивалендә ҡатнашасаҡ. Был хоҡуҡты ул «Халыҡ киноһы» тип исемләнгән Бөтә Рәсәй кинофестивалендә яуланы.
Ольга Старикова кинокартинала йәмғиәтте борсоған социаль мәсьәләләрҙе күтәрә. Аҡсаһыҙлыҡ, битарафлыҡ һәм табиптарҙың ғәмһеҙлеге. Бигерәк тә авторҙы 10 йәшлек малайҙың яҙмышы борсой. Ул сираттағы прививканан һуң аяҡтан яҙа. Тома етем ҡалған баланы ҡартатаһы яңғыҙы тәрбиәләй. Инвалид коляскаһындағы ейәнен ул дауаханалар буйлап та йөрөтөп ҡарай. Әммә ыңғай һөҙөмтәгә ирешә алмай.
Фәғил Заһитов церебраль фалиждан яфаланған ейәнен аяҡҡа баҫтырыу өсөн бар көсөн һала. Шул саҡ осраҡлы ғына бер табипҡа юлыға. Заманса алым менән дауаланыуға өмөт биргән белгескә ул берҙән-бер машинаһын һатып аҡсаһын да бирә. Ә бер нисә айҙан һуң сабый тәүге аҙымдарын яһай.