Баш ҡаланың фольклор ансамбле Өфөлә ҙур тамаша ойошторҙо. Заманса сюжеттар менән байытылған халыҡ йырҙарын һәм бейеүҙәрен зал алҡыштарға күмде. «Мираҫ» - вокаль, хор һәм уйын ҡоралдары оркестры, хореографияны бергә туплаған күп яҡлы ижади коллектив. Был юлы улар тамашасыһын Ҡала мәҙәниәт һарайына йыйҙы.
Осҡон уйнатып бейеүсе аҫыл егеттәр, аҡҡоштарға тиң зифа буйлы һылыу ҡыҙҙар... Күҙ ҡамашырлыҡ киң сәхнәлә - сағыу кейемдәр балҡышында сығыш яһаусы «Мираҫ» фольклор ансамбле. Ижади коллективтың репертуары йылдан-йыл камиллаша бара. Әлеге көндә 70-тән ашыу номер иҫәпләнә. Милли сәнғәт өлгөләрен һаҡлау, уның ни тиклем бай үҙенсәлекле булыуын раҫлау - коллективтың төп йүнәлеше.
Ансамбль тамашасы хөкөмөнә өс премьера әҙерләгән. Береһенән-береһе үҙенсәлекле, тәрән мәғәнәле сығыштарҙы халыҡ йылы ҡабул итте. Сәхнәлә - «Шоңҡар» бейеүе. Уны ансамблдең солисы Илнур Әйүпов башҡара. Сәнғәткә килеүенә ун йыл тулһа ла, ижади коллективта ул икенсе йылын тултырып өлгөргән. Бейеүҙе күңел аша үткәргәндә генә мәғәнәһен тойорға мөмкин, тигән фекерҙә ансамбль солисы.
Фольклор ансамбле егерме йыл элек Өфө ҡала Советы халыҡ депутаттары президиумы тарафынан ойошторола. 2006 йылда яңы һулыш алған коллективҡа «Мираҫ» йыр һәм бейеү фольклор ансамбле исеме бирелә. «Мираҫ»тар ниндәй генә ҡитға сәхнәләрен яуламаған! Уларға Төркиә, Франция, Италия, Швейцария, Болгария һәм башҡа ил тамашасылары алҡышлаған.
Мәҙәниәт бар икән, тимәк, халыҡ та йәшәй. «Мираҫ»тар ҡуйған төп маҡсат ошо. Башҡортостан сәнғәте көмбәҙендә ата-бабаларҙан ҡалған рухи байлыҡты һаҡлап, киләсәк быуынға тапшырған, республика мәҙәниәтен сит илдәрҙә танытҡан коллектив йондоҙло юлда. Азат Ғәлиуллин Сығанаҡ: Башҡортостан юлдаш телевидениеһы