11–12 февралдә Венецияның Малибран театрында тамашасыларҙың һорауы буйынса «Мираҫ» йыр һәм бейеү фольклор ансамбленең концерттары үтә. 10 февраль ансамбль Сан Марко майҙанында фестиваль сиктәрендә үткән гала концертта сығыш яһаны. Киң билдәле коллектив «Рәсәй мәҙәниәтенең Венециялағы миссияһы» проектын асыуҙа ҡатнашты. «Мираҫ» ансамблен был тамашала ҡатнашыу өсөн тиҫтәләгән ижади коллективтар араһынан «Халыҡ-ара программалар дирекцияһы» һайлай. Ансамбль артистарының юғары профессиональ әҙерлеге мөһим сарала ҡатнашыуға тулы хоҡуҡ бирә. Фестивалдә коллектив Башҡортостан һәм донъя халыҡтары бейеүҙәре программаһы менән сығыш яһаны. Бында Рәсәйҙән Кавказ халыҡ бейеүҙәре ансамбле «Дагестан йәштәре» лә ҡатнаша.
Башҡортостан президенты Р.З. Хәмитовтың Дәүләт йыйылышы Ҡоролтайға мөрәжәғәтендә милли мәҙәни брендтар булдырыу һәм Башҡортостан мәҙәниәтенең юғары уңыштарын донъя кимәленә күтәреү хаҡында әйтелеп кителә. Президент фекеренсә, техник һәм башҡарыу кимәле юғары булған оригиналь спектаклдәр, мюзиклдар, рок-опера һәм башҡа проекттар республика мәҙәниәтен башҡа илдәргә танытасаҡ. «Башҡортостандың мәҙәни донъяһы» порталы