1 февралдә, Өфөнөң «Нефтсе» мәҙәниәт һарайында «Мираҫ» фольклор бейеү ансамбле тамашасыларға өр-яңы программа тәҡдим итте. 

Билдәле булыуынса, «Мираҫ» ансамбле (етәксеһе Валерий Степанов), 1992 йылдың октябрендә халыҡ депутаттарының Өфө ҡала Советы президиумы ҡарары буйынса ойошторола. 2006 йылда ансамбль «Мираҫ» фольклор бейеү ансамбле муниципаль учреждениеһы тип үҙгәртелә. 

«Нефтсе» мәҙәниәт һарайында йыр-моң һөйөүсәләргә мираҫтар ябай концерт ҡына түгел, ә бик күп вокаль-хореографик композицияларҙан торған ысын тамаша бүләк итте. Уларҙың вокаль – бейеү композициялары, хор һәм яңғыҙ башҡарған сығыштары һәр-кемдең күңеленә хуш килде. Бигерәк тә удмурт бейеүе «Зигзаг», татар халыҡ бейеүе «Өлгөр», рус халыҡ бейеүе «Себер», шулай уҡ төрөк йыры «Камал Паша», йырсылар Салауат Мөхәмәдйәров менән Гүзәл Асылбаеваның дуэты, Венера Юлгилдинаның сығыштарын тамашасы йылы ҡабул итте. 

Ансамблдең үҙ стилен юғалтмауы, гүзәл Башҡортостаныбыҙҙың матурлығын, байлығын, милли үҙенсәлектәрен , шулай уҡ бай башҡорт милли сәнғәте аша Рәсәйҙең башҡа халыҡтары фольклорын, сит ил халыҡтары мәҙәниәтен дә күрһәтә алыуы ҡыуандырҙы. 

«Башҡортостандың мәҙәни донъяһы» порталы