1 февралдә, Өфөнөң «Нефтсе» мәҙәниәт һарайында «Мираҫ» фольклор бейеү ансамбле тамашасыларға яңыртылған программа тәҡдим итәсәк. 

Ансамбль етәксеһе Валерий Степанов хәбәр итеүенсә, тамашасыларҙы ябай концерт ҡына түгел, ә бик күп вокаль-хореографик композицияларҙан торған ысын тамаша көтә. 

Билдәле булыуынса, «Мираҫ» ансамбле 1992 йылдың октябрендә халыҡ депутаттарының Өфө ҡала Советы президиумы ҡарары буйынса ойошторола. 2006 йылда ансамбль «Мираҫ» фольклор бейеү ансамбле муниципаль учреждениеһы тип үҙгәртелә. 2009 йылда «Мираҫ»ҡа баш ҡалабыҙҙың тағы ла бер танылған коллективы – «Забава» урыҫ халыҡ уйын ҡоралдары ансамбле ҡушылды. 

«Мираҫ» ансамбле репертуары йылдан–йыл камиллаша һәм байый бара. Бөгөнгө көндә уларҙың вокаль – бейеү композицияларҙы, хор һәм яңғыҙ башҡарған сығыштарҙы туплаған етмештән артыҡ номерҙары иҫәпләнә. Репертуар нигеҙен республикабыҙҙа йәшәүсе халыҡтарҙың йыр һәм бейеүҙәре тәшкил итә. Ансамблдең хореографияһының һәм йырҙарының үҙ стиле бар, улар гүзәл Башҡортостаныбыҙҙың матурлығын, байлығын сағылдырған милли үҙенсәлектәр менән һуғарылған. 

Ошо 11 йыл эсендә ансамбль күп тапҡырҙар лауреат була һәм күп кенә халыҡ-ара фестивалдәр һәм конкурстар Гран-прийын яулай, төрлө форумдарҙа ҡатнаша. «Мираҫ» фольклор бейеү ансамблен республикабыҙ һәм Рәсәй ҡалалары ғына түгел, шулай уҡ күп сит илдәр — Бельгия, Франция, Испания, Португалия, Болгария, Венгрия, Лаос, Вьетнам тамашасылары лы белә һәм ярата. 

«Мираҫ»тар менән осрашыуҙан, аралашыуҙан ситтә ҡалмағыҙ, концерттарға рәхим итегеҙ, дуҫтар! 

«Башҡортостандың мәҙәни донъяһы» порталы