Баш осондағы тыныс күкте мираҫ итеп ҡал­дырған ветерандарҙы хөрмәтләп, “Мираҫ” йыр һәм бейеү фольклор ансамбле 24 октябрҙә Өфө ҡала мәҙәниәт һарайында Бөйөк Еңеүҙең 70 йыллы­ғына арналған миҙгелен асты.

“Ветерандарҙы онотмайыҡ”, “ветеран­дарҙың сафы һирә­гәйә”, тибеҙ. Тик ни күрәбеҙ?.. 9 Май байрамы һәм шул арала ғына ойошторолған осрашыу­ҙар, за­каз буйынса ваҡытына тап килтереп йырлан­ған йыр­ҙар. Ни­сәмә йыл шулай дауам итә килә: тарихҡа күҙ йомола, ба­тырҙар онотола...

Әйтелгән ҡалыпты ватып, “Ми­раҫ” йыр һәм бейеү фольклор ансамбле һалҡын көҙҙә 1945 йылдың йылы яҙын сәх­нәгә ҡай­тарҙы. Өфө ҡала мәҙә­ниәт һа­райы кесеһенән алып олоһона тиклемге тамашасы ме­нән тул­ды. Улар араһында орден-миҙал таҡҡан ветеран­дарҙы күреү бигерәк тә шат­лыҡлы ине.

Франция, Испания, Португалия, Италия, Бельгия, Люксембург, Болгария, Венгрия, Төр­киә, Швейцария, Германия илдәрен­дә һәм, әлбиттә, үҙ еребеҙҙә танылыу алған “Ми­раҫ” төрлө милләт бейеү­ҙәрен ҡуйҙы, йыр­ҙарын йырланы. Йыр-бейеүҙән тыш, кил­гән кеше музыка ҡорал­дары оркестры­ның сығышына ла тамаша ҡылды.

Абхаздарҙың халыҡ бейеүе, төрөк­тәрҙең “Камаль Паша” йы­ры һәм Сергей Есениндың хор менән башҡарылған шиғыры тамашасының күңеленә бигерәк тә яҡын булды, алҡыштарға кү­мелде. Шул уҡ ваҡытта ҡаҙаҡ­тарҙың “Аҡ ҡа­йын­дар” исемле лирик бейеүе үҙебеҙҙең ҡа­йын­лыҡтарға алып ҡайтһа, Илшат Шәй­хуллиндың йыры “ғүмер йыл­ғаһын­да” ағыҙҙы. Ҡырым та­тар­ҙарының, аргентин, төрөк, молдован халыҡтарының бе­йеүҙәре лә иғтибарһыҙ ҡал­ма­ны. Рус телендә “Рәсәй-әсә” йы­ры бик аһәңле яңғыраны. Һу­ңында бейеп түгел, бөркөт­тәй осоп башҡарылған “Салауаттың мираҫы” исемле бейеү йөрәк­тәргә рух өҫтәне. 

Милли батырыбыҙ Салауат Юлай улы образы аша борон-борондан иреккә ынтылған, тыуған илен һаҡлауҙа таш ҡурған булған ата-бабаларыбыҙ күҙ алдына баҫты. Кәрәк саҡта Бүгәсәү менән берләшеп баш күтәргән, “Төньяҡ амур­ҙары” исеме менән француздарҙың һу­шын алған һәм Бөйөк Ватан һуғышында танктарға ҡаршы аттарҙа сапҡан ба­тыр­ҙарҙың ораны яңғыраны, ҡылыстары сыңланы... Тарих! Ул онотол­маҫ, ә аңы­быҙҙа уйылып ҡалыр. Бының өсөн ба­тыр­ҙар­ҙың, ветерандарҙың изге көрәше йәйҙең йәмле көнөндә, көҙҙөң һырғаҡ һалҡынында һәм ҡыш­тың буранында ла йылы нурҙай, йөрәктәрҙә мираҫ булып һаҡ­ланһын. 

Ошо йәһәттән тарихты тер­геҙеүгә бу­лышлыҡ иткән “Ми­раҫ” йыр һәм бейеү фольклор ан­самбленең сығышы маҡтау­ға лайыҡ, афарин! Артабан ошондай сы­ғыш­тарҙы дәррәү күтә­реп, йолаға әй­лән­дер­һәк, би­ге­рәк тә яҡшы булыр ине.

Автор: Денис ҒИЛМАНОВ.

Сығанаҡ: "Башҡортостан" гәзите.