Яңы китапханалар булдырыу - заман талабы. Ә моделле китапхана үҙенең бай эстәлеге менән уҡыусыны йәлеп итеп тора. Уның маҡсаты - халыҡты һәр төрлө мәғлүмәт менән юғары кимәлдә тәьмин итеү, шулай уҡ, китапхана ҡулланыусыларына ғына түгел, ә барса халыҡҡа файҙалы булыу. Моделле китапхана ул – заманса йыһазландырылған, интернет селтәре менән тоташтырылған, эстетик зауыҡ менән биҙәлгән мәҙәни усаҡ булырға тейеш. Уларҙың тәүгеһе республикала 2004 йылдан эшләй.

Ошо юҫыҡта бөгөн Өфөнөң Конгресс-холл бинаһында «Рәсәй федерацияһында моделле китапханалар урындағы үҙидараны ойоштороу үҙәктәре» тип исемләнгән төбәк-ара семинар асылды. Был семинарҙы РФ һәм БР Мәҙәниәт министрлыҡтары, «Пушкин китапханаһы» фонды, БР З. Вәлиди исемендәге милли китапхана ойошторған.

Сараға күрше Силәбе өлкәһенән, Татарстан, Удмурт республикаларынан вәкилдәр килгәйне.

Семинарҙа ҡатнашыусыларҙы БР Мәҙәниәт министры урынбаҫары Рәнис Рәйес улы Алтынбаев тәбрикләне һәм үҙенең изге теләктәрен еткерҙе. Ул шулай уҡ БР Хөкүмәте премьер-министры урынбаҫары Салауат Сәғитовтың һәм БР Мәҙәниәт министры вазифаһын башҡарыусы Дәүләтова Камилә Йәүҙәт ҡыҙының тәбрикләү сәләмдәрен еткерҙе.

Төбәк –ара семинар Өфөлә ике көн барасаҡ. Иртәгә сарала ҡатнашыусылар Өфө, Бөрө, Кушнаренко райондары моделле китапханаларына сәфәр ҡылып уларҙың яңы эш алымдары, тәжрибәләре менән уртаҡлашасаҡ. 

 Фотогалереяға күсергә

«Башҡортостандың мәҙәни донъяһы» порталы