Мәжит Ғафури исемендәге Башҡорт дәүләт академия драма театрында диңгеҙ флоты хеҙмәткәрҙәре етеп килгән Ватанды һаҡлаусылар көнөн билдәләне.

Вена вальсы, хәрби оркестр һәм йырҙар. Моряктар етеп килгән Ватанды һаҡлаусылар көнөн билдәләне. Башҡорт дәүләт академия драма театрында тантаналы йыйылыш үтте.

Фәрит Ғәләүев Ватанды һаҡлауға 32 йыл ғүмерен бирә. Жданов крейсерында капитан ярҙамсыһы вазифаһында ул Урта диңгеҙҙе арҡырыға буй гиҙеп сыға. Һуңынан Тымыҡ диңгеҙ училищеһында буласаҡ Ватан һаҡсыларын тәрбиәләй. Йылдар үтә, әммә диңгеҙ хаҡындағы хәтирәләр һүрелмәй, ти запастағы моряк.

Фәрит Ғәләүев кеүек утты-һыуҙы кискән хәрбиҙәрҙең һәр береһе тураһында китап яҙырға мөмкин. Сарала капитандар, адмиралдар, диңгеҙ һәм йылға училищеһы курсанттары, летчиктар, Афған һуғышы ветерандары ҡатнашты. Ойоштороусылар әйтеүенсә, йыйылыштың төп маҡсаты - йәш быуында Ватанға һөйөү тәрбиәләү.

Шулай уҡ тантанала «Комдив Шайморатов. Геройҙың ҡайтыуы» акцияһы ла ойошторолдо. Унда һәр кем данлыҡлы генералға «Рәсәй Геройы» исемен биреү өсөн ҡултамға ҡуйыу мөмкинлегенә эйә булды.

Сығанаҡ: Башҡортостан юлдаш телевидениеһы